Мотивациското писмо е одлична можност да оставите супер прв впечаток врз потенцијалниот работодавец и да покажете зошто би биле идеален кандитат за работната позиција за која аплицирате. 

Тоа е значајна алатка која ви овозможува да опишете како вашите вештини и искуства соодветствуваат со потребите на потенцијалниот работодавач. Без оглед дали се подготвувате за промена во кариерата или аплицирате за одредена работна позиција, пишување на добро структурирано мотивациско писмо кое ќе го привлече вниманието на менаџерот за вработување може да одземе доста време. 

Затоа, ние ќе ви објасниме како да го напишете совршеното мотивациско писмо и ќе ви посочиме неколку совети кои ќе ви помогнат да се издвоите од останатите. 
Но, прво да објасниме што всушност претставува мотивациското писмо и зошто е важно. 

Што е мотивациско писмо?

Мотивациското писмо е придружен документ адресирано до регрутерот или менаџерот за вработување, кое ги вклучува вашите контакт податоци, позицијата за која аплицирате и дополнителни информации и детали. 

Во мотивациското писмо треба јасно да ги наведете вашите квалификации, релвантни вештини и претходни искуства кои соодвествуваат на описот на работното место за да нагласите дека сте го направиле потребното истражување за позицијата за која аплицирате и дека сте подготвени да се приклучите на тимот. 

Зошто е важно да се напише добро мотивациско писмо?

Идејата позади пишување на мотивациско писмо кое ќе го придружува вашето CV е едноставна - треба да биде доволно интересно за да го заинтересира работодавачот да дознае повеќе за вашите вештини и искуства со цел да ве повика на интервју. Мотивациското писмо ви овозможува да ги сумирате вашите искуства и вештини и детално да објасните зошто сте идеалниот кандидат за конкретната работна позиција.

Не сите кандидати ќе се потрудат да напишат квалитетно мотивациско писмо или уште па приспособено за конкретната работа за која аплицирате. Затоа потрудете се да напишете оригинално мотивациско писмо кое ќе одговора на специфичните потреби на огласот за работа и со тоа да се одвоите од другите апликанти. Тоа ви дава поголема шанса да бидете во потесниот круг за избор за интервју. 

Како треба да изгледа мотивациското писмо?

Имајте на ум дека мотивациското писмо е додаток на вашето CV а не негова замена, па затоа пробајте да не го повторувате она што го имате наведено во вашата биографија. 

Ако пишувате мотивациско писмо за прв пат, процесот може да ви изгледа навистина тешок. Можеби не знаете како треба да изгледа, или не ви оди од рака пишувањето. Но, доброто мотивациско писмо не бара од вас да сте ултра креативни ниту да бидете добри „писатели“. Сè што треба да направите е да следите испробан и проверен формат: 

• Заглавие - Вашите контакт информации (најчесто горен десен агол)
• Обраќање кон менаџерите за вработување/ работодавци одговорни за вработување
• Прв параграф - Привлечете го вниманието на читателот со 2-3 од вашите врвни достигнувања
• Втор параграф - Објаснете зошто сте најдобар кандидат за конкретната работа
• Трет параграф - Објаснете зошто добро би се вклопиле во компанијата
• Формално поздравување

Совети како да напишете мотивациско писмо

Обезбедете информации кои не се вклучени во вашето CV

Вашето мотивациско писмо не треба да биде само уште една верзија на вашата биографија. Наместо тоа, ова писмо треба да обезбеди конкретни докази за тоа што ќе донесете во компанијата. За вашето писмо, изберете две до три вештини или способности што сакате да ги истакнете. Потоа понудете примери кога сте ги покажале тие особини.

На пример, ако сакате да го истакнете вашето искуство и вештини за подучување на деца, дајте пример за тоа како успешно сте подучиле ученик. Може да вклучите одреден момент во наставата кога сте биле особено успешни.

Напишете мотивациско писмо прилагодено за конкретната работа

Менаџерот за вработување може брзо да каже дали сте напишале генеричко мотивациско писмо што го користите за секоја работа. Тоа е брз начин да ја исфрлат вашата апликација. Наместо тоа, одвојте време да го прилагодите вашето мотивациско писмо за да го одразува вашиот интерес за конкретната позиција и компанија за која аплицирате.

Вклучете ги клучните зборови од огласот за работа и во вашето писмо. На пример, ако листата вели дека идеалниот кандидат има искуство со „донесување одлуки водени од податоци“, може да вклучите пример за време кога сте користеле податоци за да донесете одлука или да решите проблем.

Не ги потенцирајте вашите недостатоци 

Општо земено, не се извинувајте за ништо во вашето мотивациско писмо. Постојат некои работи што не треба да ги вклучите. Ако ви недостасува потребната вештина или диплома, не го спомнувајте тоа. Наместо тоа, фокусирајте се на истакнување на вештините и искуствата што ги имате и објаснете како тие ве прават погодни за работата.

Меѓутоа, кога имате поголеми празнини во вашата работна историја, без разлика дали сте биле отпуштени, сте дале отказ или сте одвоиле време за вашето семејство, патување, враќање на училиште, или која било друга причина, вашето мотивационо писмо ви дава можност да го објасните истото. Сепак, ако одлучите да ја објасните оваа празнина во вработувањето во вашето писмо, направете го тоа многу кратко, а потоа брзо вратете се на истакнување на вашите вештини и способности.

Обидете се да го најдете лицето за контакт

Не секогаш е лесно да се најде лицето за контакт на кое ќе му се обратите во вашето мотивациско писмо, но вреди да потрошите малку време обидувајќи се. Кога станува збор за мотивациските писма, одвојувањето време за дознаете повеќе за компанијата и менаџерот за вработување е навистина важно. 

Не заборавајте да го упатите вашето мотивациско писмо до конкретниот менаџер за вработување кој ќе го чита вашето писмо. Ако не знаете која е таа личност, проверете ја веб-страницата на компанијата или дури и јавете се во компанијата и прашајте.

Бидете свои и покажете го вашиот карактер

Нормално е дека вашето мотивациско писмо треба да биде професионално но тоа не значи дека треба да користите неприроден формален јазик. Избегнувајте фрази кои не изгледаат природно, како „Сакам да го пренесам мојот искрен интерес за позиција во вашата извонредна институција“. Наместо тоа, користете јасен и природен јазик.

Исто така, избегнувајте клише, прекумерно употребувани фрази кои менаџерите за вработување не ги читаат (на пример „тимски играч“). Заменете ги тие фрази со моќни зборови како „иницира“ и „соработува“.

Пишувањето на совршеното мотивациско писмо не мора да биде процес кој одзема многу време. Следете ги овие 5 едноставни совети и напишете писмо кое ќе биде забележано во процесот за вработување.