Повеќето луѓе се смрзнуваат од помислата да побараат од својот шеф покачување на платата. Ако вашата компанија не ги зголемува платите на годишно ниво или не сте на ред за унапредување, барањето може да биде единствениот начин да го добиете покачувањето што знаете дека го заслужувате. Треба да разберете дека е сосема прифатливо да се побара покачување, а повеќето менаџери на компании и сопственици на бизниси сакаат да се грижат за своите вработени.

Иако процесот изгледа застрашувачки и непријатен, не мора да биде таков, особено ако ако знаете како функционира вашиот претпоставен. Ако сте подготвени со факти, ќе се чувствувате посигурни кога ќе го започнете разговорот.

Зошто сакате покачување?

Ова е клучното прашање на кое треба да одговорите. Наведете ги сите ваши причини зошто сакате покачување пред да го предложите вашето барање. Не барајте поголема плата затоа што вашата кирија се зголемила или сте фрустрирани затоа што вашиот колега не работи напорно како вас а заработува исто.

Кога го поднесувате вашето барање, вашите причини треба да се засноваат на вашите перформанси и вредноста што ја носите на тимот и на компанијата.

Колкаво покачување треба да побарате?

Процентот на покачување што ќе го побарате зависи од многу фактори. Во зависност од причините што ги наведувате за покачување на платата и должината на времето што поминало од вашето последно покачување, може да побарате покачување во опсег од 10% до 20%. Сепак, колку е поголем процентот што го барате, толку подобри треба да бидат вашите причини. На пример, сте прифатиле позиција со малку службени патувања но тоа се сменило и сега сте на пат повеќе од половина од времето, покачување од 20% е разумно бидејќи вашите должности значително се промениле.

Меѓутоа, ако барате зголемување на платата бидејќи поминало повеќе од една година од вашиот последен бонус, а вие сте продолжиле добро да ги извршувате вашите редовни должности, почнете со поразумен процент. Сè уште заслужувате покачување, но треба да го ублажите вашето барање со реалноста на вашите придонеси.

Кога е добро време да побарате покачување?

Некои велат дека никогаш нема совршено време да побарате покачување, но сепак користете здрав разум. Не барајте покачување во чувствително време, како на пример ако вашата компанија отпушта луѓе, вашиот оддел нема задоволувачки перформанс, или вашиот шеф се справува со тешка лична ситуација.

Размислете за тековните практики за зголемување на платите на вашата компанија. Ако тие обично даваат покачувања во првиот месец од годината, пријдете му на вашиот шеф во ноември или декември. На овој начин, ќе му дозволите да го разгледа вашето барање и да разговара со неговиот шеф или надреден.

Ако не постои стандардна практика за покачување, обидете се да го поднесете вашето барање во „добро“ време, како на пример кога знаете дека вашиот шеф е задоволен од вашата работа, во успешен квартал или период од годината не сте под значителен стрес. 

Како да побарате покачување од вашиот претпоставен?

Дајте си време да се подготвите за разговорот и дајте му време на вашиот претпоставен да го разгледа вашето барање.

Закажете состанок со вашиот претпоставен однапред наместо да тропнете на нивната врата и „од ведро небо“ да го изнесете вашето барање. Ова покажува дека внимавате на нивното време.

Најдобар начин да побарате покачување е да го направите вашето истражување и да ја знаете вашата вредност, а потоа да му пристапите на вашиот шеф на професионален начин. Еве пет совети за тоа како успешно да побарате покачување.

5 совети како да побарате покачување

1. Наведете ги вашите достигнувања од изминатите шест месеци, изминатата година и вашето време со компанијата.

Опишете како вашите достигнувања позитивно влијаеле на вашиот оддел и компанија како целина - и наведете конкретни бројки и статистика ако е можно. На пример, можете да кажете: „Во изминатата година, генерирав 5.000 потенцијални клиенти за компанијата, што е зголемување за 8% од претходната година. Резултирачката продажба изнесуваше 580.000 денари во нов бизнис“.

Тешко е за секој менаџер да одбие барање кога ќе му бидат претставени такви бројки. Колку се посилни податоците што ги давате, толку е поголема веројатноста да го добиете заслуженото покачување.

Покажување на напорите што сте ги вложиле и работата што сте ја завршиле за да и помогнете на компанијата, исто така покажува дека сте лојален работник. Лојалните вработени уживаат доверба од нивните работодавци, што ќе му помогне на вашиот случај.

2. Дознајте која е конкурентската плата за вашата позиција

На сајтови како Upwork ili Fiverr, можете да видите како вашата моментална плата се споредува со слични позиции во други компании. LinkedIn е исто така одличен ресурс за оваа цел. Можете или да ги прегледате објавите за работа на страницата или да ги користите сопствените просечни граници на плата на LinkedIn наведени на објавите за работа. Размислете за индустријата во која се наоѓате, големината на компанијата и вашите придобивки.

Некои компании едноставно не плаќаат добро, па затоа е најдобро да се консултирате со експерти за вработување кога е можно. Ако имате какви било врски со локални регрутери и менаџери за вработување (можеби на LinkedIn), прашајте ги дали би ја разгледале вашата биографија за да ви дадат реална цел за плата за вашата позиција и искуство.

3. Објаснете му на вашиот претпоставен кои се неговите придобивки

Имајте на ум дека вашиот претпоставен не се грижи за вашите исплати на кредити или за вашиот одмор од соништата. Вашиот претпоставен се грижи која е неговата придобивка од секоја ситуација. Веќе објаснивте што сте направиле за компанијата, но можеби е паметно  да го објасните и вашиот план за иднината. Претставете им ги вашите цели, како тие цели имаат корист за компанијата и како ќе ги постигнете.

4. Бидете самоуверени.

Бидете сигурни во себе кога барате покачување. Да, тоа е застрашувачко, но имате докази кои ве поддржуваат. Сепак подгответе се за фидбек и имајте предвид дека одговорот може да биде не. Ако ви се даде покачување, бидете подготвени да продолжите да работите напорно. Знаевте дека треба да добиете покачување - сега покажете му на вашиот претпоставен дека го заслуживте тоа.

5. Поднесете го вашето барање во писмена форма

Големи се шансите дека вашиот претпоставен има свој претпоставен со кого ќе треба да го сподели вашето барање за зголемување на платата. Обезбедете им го вашиот предлог кој го сумира вашето барање, конкурентскиот износ на плати и придобивките што компанијата ги добива од вашите напори.

Барање на покачување на плата може да биде стресно и непријатно, но ништо не губите ако пробате.