Кога конкурирате за работа, добрата биографија и мотивациското писмо се важни, но препораките од вистинските луѓе можат да бидат тоа што ќе ја направи разликата. Компаниите сè почесто сакаат да слушнат од некој што ве познава на професионално поле. Затоа е важно да знаете кого да изберете, како да го замолите и како да изградите професионален круг на луѓе што ќе ве препорачаат со сигурност.

1. Изберете луѓе што ве познаваат од работа

Најдобрите референти се оние што веќе ве имаат видено „во акција“. Тоа може да бидат:

• Поранешни менаџери или супервизори
• Колеги со кои сте работеле на важни проекти
• Клиенти или соработници, доколку сте фриленсер или имате свој бизнис

Важно е тие да имаат што да кажат за вашата работа, одговорност, комуникација и однесување во тим.

2. Комуницирајте отворено и професионално

Не испраќајте само порака од типот „Можеш ли да ми бидеш референт?“
Наместо тоа:

• Објаснете за која работа аплицирате
• Потсетете ги на проекти или ситуации во кои сте соработувале успешно
• Замолете ги дали би сакале да дадат искрена препорака

Пример порака:

„Здраво [име], аплицирам за позиција како [позиција] во [компанија]. Мислам дека твојата перспектива од нашата соработка во [проект/компанија] би ми била од голема корист. Дали би било во ред доколку те наведам како референт?“

3. Одберете луѓе што зборуваат со авторитет

Референцијата скоро секогаш има поголема тежина доколку доаѓа од некој што има позиција или искуство што се почитува во индустријата. Тоа не значи дека мора да е менаџер, може да е и колега, но со кредибилитет.

Совет: Понекогаш е подобро да имате неколку добри и детални препораки отколку само „формално“ спомнати имиња.

4. Одржувајте контакт и инвестирајте во самиот професионален круг

Добрата професионална ,,мрежа” не се гради во моментот кога ви треба, туку многу време пред тоа. Затоа наш совет би било да:

• Останете во контакт со поранешни колеги
• Споделувајте што правите и работите, како и каде сте моментално на кариерно поле
• Бидете подготвени и вие да помогнете кога некој друг ќе ви се обрати

Градењето на професионални односи не мора да биде секогаш формално, понекогаш и обична „Како си?“ порака може да го одржи контактот помеѓу вас.

Заклучок

Изборот на референти не е само технички дел од процесот, тој е дел од вашата лична репутација. Одберете луѓе што навистина ве познаваат, комуницирајте искрено и одржувајте го вашиот професионален круг со почит и искреност. Кога референцијата е добро избрана, таа не само што ве препорачува, туку ве претставува во најдобро светло.