На секој од нас понекогаш му е потребна пауза. Животот не оди секогаш во посакуваниот правец и кариерите не се исклучок. Без разлика дали станува збор за пауза поради родителство, грижа за семејство, патување, болест или едноставно потреба да земете здив, кариерните паузи не треба да ве засрамуваат. Напротив, тие можат да бидат моќен доказ за зрелост, самосвесност и способност за приоритизирање.

Еве неколку совети како да ги претставите паузите во кариерата на начин кој ќе биде од ваша корист:

1. Бидете искрени, но не навлегувајте во детали

Работодавците не очекуваат да ги знаете сите одговори, но очекуваат искреност. Наместо да ги „криете“ паузите, спомнете ги во вашето CV или интервју. На пример:

„Во овој период се посветив на личен развој и семејни обврски. Тоа ми помогна да стекнам нова перспектива и повторно да ја вратам мојата желба за работа и нови предизвици.“

2. Фокусирајте се на тоа што сте научиле

Секој период од животот носи нешто ново и вредно. Ако сте се грижеле за дете, сте стекнале нови животни вештини, како на пример подобро организирање на времето, до тоа да останете смирени и фокусирани кога имате нови и многу обврски. Ако сте патувале, веројатно сте развиле креативност, адаптивност, културна сензитивност.
Може да го претставите на следниов начин:

„Во овој период стекнав поголема емоционална интелигенција и способност за решавање на проблеми во реални и често непредвидливи ситуации.“

3. Истакнете што сте работеле во позадина

Дури и ако не сте биле формално вработени, веројатно сте правеле нешто: курсеви, фриленс проекти, волонтирање, читање, самостојно учење. На пример:

„За време на паузата, завршив курс за дигитален маркетинг и работев на неколку независни проекти за мали бизниси.“

4. Бидете искрени, но зборувајте со сигурност

Пауза не значи слабост. Понекогаш токму луѓето кои се осмелиле да запрат и да се преиспитаат, се оние што се враќаат посилни. Тоналитетот со кој зборувате за паузата е од големо значење:

„Одлуката да направам пауза беше внимателно испланирана и ми помогна да се вратам со појасни цели и силна мотивација.“

5. Подгответе кратко објаснување за интервју

Размислете однапред како ќе зборувате за вашата кариерна пауза. Подгответе си кратка, уверлива и позитивна изјава, и преминете кон она што е важно.

Заклучок:

Пауза не значи стоп. Тоа е само запирка во реченицата на вашата кариера. И како што една добра приказна има свои подеми и падови, така и секој професионален пат е уникатен. Наместо да ги „бришете“ тие периоди, вклучете ги како дел од вашата приказна – со вистината, со сила и со човечност.

Работодавците не бараат совршени луѓе туку вистински.