Испотени дланки, забрзано срце, растреперен глас, негативни мисли... Звучи познато? 

Ова се само некои од многуте симптоми на анксиозност кои луѓето ги доживуваат пред и за време на интервјуто за работа.

Без оглед на вашето досегашно работно искуство, веројатно сите вие можете да се сетите на ситуација кога сте се чувствувале анксиозно и вознемирено пред интервју за работа.

Понекогаш, можете брзо да ги пренасочите мислите и да си ја вратиме самодовербата, но не е секогаш така лесно. Затоа е корисно да имате неколку трикови во задниот џеб кои ќе ви овозможат да се смирите, да ја вратите концентрацијата и самодовербата пред важното интервју.

1. Имајте за цел да се поврзете со интервјуерите, а не да ги импресионирате.

За да ја зголемите самодовербата, вашата енергија треба да е фокусирана во градење на природен и спонтан однос со вашиот интервјуер наместо во тоа да пробувате да го импресионирате.

2. Користете техники на дишење.

Клучно за самодовербата е чувството на опуштеност, па така вежбите за дишење пред интервјуто се корисни бидејќи тие го помагаат смирувањето на нервите. Бавното, свесно и длабоко дишење ќе го врати кислородот во вашиот мозок и ќе ви помогне да размислувате јасно.

3. Бидете љубезни кон себе пред интервјуто.

Пред самото интервју најважно е да зборувате со себе како со најдобар пријател и да ги отфрлите сите критички мисли што ви стојат на патот. Психолозите укажуваат на тоа дека позитивното зборување со себе пред интервјуто значително ја зголемува самодовербата.

4. Не брзајте.

За време на интервјуто, многу важно е да не заборавате да зборувате бавно, бидејќи многу често имаме тенденција да брзаме кога сме нервозни или под стрес. Па така понекогаш оставањето паузи во речениците ќе ви помогне подобро да го размислите одговорот и да ја контролирате ситуацијата во која се наоѓате.

5. Замислете дека успевате.

Претставувањето дека сте успешни на претстојното интервју за работа ќе ви даде поттик за зголемување на вашата самодоверба. Пред да влезете, започнете да визуелизирате успешно интервју: замислете како одите до собата, како се чувствувате опуштено и како одговарате на прашањата со целосна сигурност.

6. Прифатете ја вашата анксиозност.

Одлична техника за самодоверба е да се „дружите“ со вашата анксиозност. Пред интервјуто, помислете и обратете и се во себе: „Ти благодарам многу што си тука. Знам дека сакаш да ме заштитиш и те признавам целосно“. Тоа е всушност одлична техника да се насмеете на анксиозноста, наместо да се обидувате да ја потиснете или совладате со позитивно размислување.

По завршување на интервјуто, избегнувајте да преразмислувате за тоа што сте можеле да кажете подобро. Честитајте си што сте успеале да ги совладате сите симптоми и што сте ја искористиле оваа шанса. Направете неколку активности во кои уживате, без разлика дали станува збор за прошетка во парк, читање на книга, средба со пријателите.